(১) তলৰ প্ৰশ্নবোৰৰ উত্তৰ চমুকৈ লিখা—
(ক) পৃথিৱীৰ প্ৰধান চাৰিটা মণ্ডল কি কি?
উত্তৰ: পৃথিৱীৰ প্ৰধান চাৰিটা মণ্ডল হ’ল— স্থলমণ্ডল, জলমণ্ডল,
বায়ুমণ্ডল আৰু জীৱমণ্ডল৷
(খ) পৃথিৱীৰ প্ৰধান মহাদেশবোৰৰ নাম কি কি?
উত্তৰ: পৃথিৱীৰ প্ৰধান মহাদেশবোৰৰ নাম হ’ল— এছিয়া, য়ুৰোপ, আফ্ৰিকা,
উত্তৰ আমেৰিকা, দক্ষিণ আমেৰিকা, ওচেনিয়া আৰু এণ্টার্কটিকা বা কুমেৰু মহাদেশ৷
(গ) দক্ষিণ গোলার্ধত পৰা মহাদেশখনৰ নাম কি?
উত্তৰ: দক্ষিণ গোলার্ধত পৰা মহাদেশখনৰ নাম হ’ল— এণ্টার্কটিকা বা
কুমেৰু মহাদেশ৷
(ঘ) বায়ুমণ্ডলৰ বিভিন্ন স্তৰবোৰৰ নাম কি কি?
উত্তৰ: বায়ুমণ্ডলৰ বিভিন্ন স্তৰবোৰৰ নাম হ’ল— ট্ৰপ’স্ফিয়েৰ, ষ্ট্ৰেট’স্ফিয়েৰ,
মেছ’স্ফিয়েৰ আৰু থার্ম’স্ফিয়েৰ৷
(ঙ) জীৱৰ বাবে বায়ুমণ্ডল কিয় প্ৰয়োজনীয়?
উত্তৰ: বায়ুমণ্ডল পৃথিৱীৰ এক অতি দৰকাৰী আৰু এৰাব নোৱৰা অংগ৷
বায়ুমণ্ডলে পৃথিৱীৰ জীৱকুলৰ শ্বাস-প্ৰশ্বাসৰ বাবে প্ৰয়োজনীয় বায়ুৰ যোগান ধৰাৰ লগতে
সূর্যৰ ৰশ্মিৰ কুপ্ৰভাৱৰ পৰা জীৱ-জগতক ৰক্ষা কৰে৷
(চ) মহাদেশ আৰু মহাসাগৰসমূহৰ নাম কি কি?
উত্তৰ: মহাদেশবোৰৰ নাম হ’ল— এছিয়া, য়ুৰোপ, আফ্ৰিকা, উত্তৰ আমেৰিকা,
দক্ষিণ আমেৰিকা, ওচেনিয়া আৰু এণ্টার্কটিকা বা কুমেৰু মহাদেশ৷
মহাসাগৰসমূহৰ নাম হ’ল— প্ৰশান্ত মহাসাগৰ, আট্লাণ্টিক মহাসাগৰ, ভাৰত
মহাসাগৰ, উত্তৰ মহাসাগৰ আৰু দক্ষিণ মহাসাগৰ৷
(ছ) জীৱমণ্ডলত মানুহে কি কি পৰিৱর্তন সাধন কৰিছে?
উত্তৰ: মানুহে কৰা বিভিন্ন কার্যৰ ফলত জীৱমণ্ডলত বহুতো পৰিৱর্তন
সাধন হৈছে৷ অপৰিকল্পিতভাৱে ঘৰ-দুৱাৰ, কল-কাৰখানা, নদীবান্ধ আদিৰ নির্মাণে
জীৱমণ্ডলৰ অন্তর্গত বায়ু, পানী আৰু মাটি প্ৰদূষিত কৰিছে৷ জধে-মধে অৰণ্য
ধ্বংস কৰাৰ ফলত ভূমি ক্ষয় হোৱাৰ লগতে অৰণ্যত থকা প্ৰাণীৰ বাসস্থানৰ অভাৱ হৈছে৷
মানুহে কৰা কার্যৰ বাবে
কার্বন-ডাই-অক্সাইড গেছৰ বৃদ্ধিয়ে গোলকীয় উষ্ণতা বৃদ্ধি কৰিছে৷
(২) শুদ্ধ উত্তৰটোত ( ) চিন দিয়া—
(ক) এছিয়া মহাদেশৰ পৰা য়ুৰোপক পৃথক কৰা পর্বতমালা—
(১) এণ্ডিজ
(২) হিমালয়
(৩) য়ুৰাল
উত্তৰ: য়ুৰাল৷
(খ) শতকৰা হিচাপত বায়ুমণ্ডলত আটাইতকৈ বেছিকৈ থকা উপাদানবিধ—
(১) নাইট্ৰ’জেন
(২) অক্সিজেন
(৩) কার্বন-ডাই-অক্সাইড
উত্তৰ: নাইট্ৰ’জেন৷
(গ) কঠিন শিলাৰে গঠিত পৃথিৱীৰ প্ৰধান মণ্ডলটো—
(১) বায়ুমণ্ডল
(২) জলমণ্ডল
(৩) স্থলমণ্ডল
উত্তৰ: স্থলমণ্ডল৷
(ঘ) আটাইতকৈ বৃহৎ মহাদেশখন হ’ল—
(১) আফ্ৰিকা
(২) এছিয়া
(৩) ওচেনিয়া
উত্তৰ: এছিয়া৷
(৩) জীৱমণ্ডলত জীৱৰ বসবাসৰ উপযোগী পৰিৱেশ ৰক্ষা কৰিবলৈ আমি কি কৰা
উচিত? দলত আলোচনা কৰি লিখা৷
উত্তৰ: জীৱমণ্ডলত জীৱৰ বসবাসৰ উপযোগী পৰিৱেশ ৰক্ষা কৰিবলৈ হ’লে, পৃথিৱীৰ
সম্পদসমূহৰ ব্যৱহাৰৰ ক্ষেত্ৰত আমি সুচিন্তিত হ’ব লাগিব৷ অপৰিকল্পিতভাৱে
ঘৰ-দুৱাৰ, কল-কাৰখানা, নদীবান্ধ আদি নির্মাণৰ পৰা বিৰত থাকিব লাগিব আৰু অৰণ্য
ধ্বংসকাৰ্য বন্ধ কৰি নতুনকৈ বৃক্ষৰোপণ কৰিব লাগিব৷ তেতিয়াহে স্থলমণ্ডল, জলমণ্ডল,
বায়ুমণ্ডল, জীৱমণ্ডলৰ ভাৰসাম্য ৰক্ষা হ’ব আৰু পৃথিৱীখন জীৱৰ বসবাসৰ উপযোগী হৈ থাকিব৷
যুগুতালে— বৰ্ণালী ঠাকুৰে
