১। উত্তৰ লিখা:
(ক) অসমৰ হাবিত পোৱা চাৰিবিধ মূল্যৱান উদ্ভিদৰ নাম লিখা।
উত্তৰ: অসমৰ হাবিত পোৱা চাৰিবিধ মূল্যৱান উদ্ভিদৰ নাম হৈছে— শাল, চেগুন, গমাৰী আৰু শিশু।
(খ) বাৰিষাকালত খেতি কৰা চাৰিবিধ পাচলিৰ নাম।
উত্তৰ: বাৰিষাকালত খেতি কৰা চাৰিবিধ পাচলিৰ নাম হৈছে— লাউ, জিকা, ভোল, আৰু কোমোৰা।
(গ) অসমৰ তিনিখন বিলৰ নাম লিখা।
উত্তৰ: অসমৰ তিনিখন বিলৰ নাম হৈছে— দীপৰ বিল, চান্দডুবি বিল, চামগুৰি বিল।
(ঘ) অসমৰ বনজ সম্পদসমূহক ভিত্তি কৰি গঢ়ি উঠা দুটা উদ্যোগৰ নাম।
উত্তৰ: অসমৰ বনজ সম্পদসমূহক ভিত্তি কৰি গঢ়ি উঠা দুটা উদ্যোগৰ নাম হৈছে— জুইশলা উদ্যোগ আৰু কাগজ উদ্যোগ।
(ঙ) বিলাতী মাটি প্ৰস্তুত কৰিবলৈ ব্যৱহাৰ কৰা খনিজ সম্পদবিধৰ নাম।
উত্তৰ: বিলাতী মাটি প্ৰস্তুত কৰিবলৈ ব্যৱহাৰ কৰা খনিজ সম্পদবিধৰ নাম হৈছে চূণশিল।
(চ) চূণশিলৰ পৰা প্ৰস্তুত কৰা দুবিধ বস্তুৰ নাম লিখা।
উত্তৰ: চূণশিলৰ পৰা প্ৰস্তুত কৰা দুবিধ বস্তুৰ নাম হৈছে— বিলাতী মাটি আৰু চক পেঞ্চিল।
২। ‘ক’ অংশৰ লগত ‘খ’ অংশৰ মিলোৱা:
‘ক’ - ‘খ’
কাৰ্বি আংলঙত - চূণশিল পোৱা যায়।
ডিগবৈত - তেল শোধনাগাৰ আছে।
নাহৰকটীয়াত - খৰুৱা তেল পোৱা যায়।
মৰাণত - তৈলক্ষেত্ৰ আছে।
৩। খালী ঠাই পূৰ কৰা:
(ক) প্ৰাকৃতিকভাৱে পোৱা সকলো সামগ্ৰী _______ নহয়।
উত্তৰ: প্ৰাকৃতিকভাৱে পোৱা সকলো সামগ্ৰী সম্পদ নহয়।
(খ) অসমৰ _______ পৃথিৱী বিখ্যাত।
উত্তৰ: অসমৰ এশিঙীয়া গঁড় পৃথিৱী বিখ্যাত।
(গ) ব্ৰক্ষপুত্ৰ নৈত পোৱা _______ হ’ল পৃথিৱীৰ বিৰল জাতিৰ প্ৰাণী।
উত্তৰ: ব্ৰক্ষপুত্ৰ নৈত পোৱা শিহু হ’ল পৃথিৱীৰ বিৰল জাতিৰ প্ৰাণী।
(ঘ) ভূ-পৃষ্ঠৰ পানীভাগৰ দৰে _______ পানীভাগো আমাৰ সম্পদ।
উত্তৰ: ভূ-পৃষ্ঠৰ পানীভাগৰ দৰে ভূ-গৰ্ভৰ পানীভাগো আমাৰ সম্পদ।
(ঙ) কয়লাৰ দৰে খাৰুৱা তেলো এক প্ৰকাৰৰ _______ ইন্ধন।
উত্তৰ: কয়লাৰ দৰে খাৰুৱা তেলো এক প্ৰকাৰৰ জীৱাশ্ম ইন্ধন।
৪। তলত দিয়া বাক্যকেইটাৰ পৰা অশুদ্ধবোৰ উলিয়াই শুদ্ধকৈ লিখা—
(ক) তিতাচঁপা এবিধ কৃষিজাত উদ্ভিদ।
উত্তৰ: অশুদ্ধ৷
শুদ্ধ ৰূপ— তিতাচঁপা এবিধ বনজ উদ্ভিদ।
(খ) প্ৰাকৃতিক সম্পদ প্ৰকৃতিৰ পৰা আহৰণ কৰা হয়।
উত্তৰ: শুদ্ধ৷
(গ) নলখাগৰি, শিশু আদি উদ্ভিদ পাহাৰীয়া অঞ্চলত পোৱা যায়।
উত্তৰ: অশুদ্ধ৷
শুদ্ধ ৰূপ— নলখাগৰি, শিশু আদি উদ্ভিদ নৈ-উপনৈৰ দুয়োপাৰে পোৱা যায়।
(ঘ) শিলৰ স্তৰৰ মাজত খাৰুৱা তেল পোৱা যায়।
উত্তৰ: শুদ্ধ৷
৫। খনিজ সম্পদক কিয় অনৱীকৰণক্ষম সম্পদ বোলে?
উত্তৰ: খনিজ সম্পদসমূহ এবাৰ ব্যৱহাৰ কৰাৰ পাছত পুনৰ তাক ব্যৱহাৰ কৰিব নোৱাৰি৷ সেয়েহে ইয়াক অনৱীকৰণক্ষম সম্পদ বোলে।
৬। নৈ-উপনৈসমূহৰ ওচৰত জাহাজঘাট, ফেৰীঘাট আদি গঢ়ি উঠাৰ কাৰণ কি?
উত্তৰ: মানুহে এঠাইৰ পৰা আন ঠাইলৈ যাবলৈ আৰু বয়-বস্তু পৰিবহণৰ বাবে অতি কম খৰচী জল পৰিবহণ ব্যৱস্থাৰ সহায় লয়৷ জল পৰিবহণৰ বাবে আকৌ নাও, জাহাজ, ফেৰী আদি ব্যৱহাৰ কৰা হয়৷ সেয়ে, যাতায়ত আৰু পৰিবহণৰ সুবিধাৰ বাবেই নৈ-উপনৈসমূহৰ ওচৰত জাহাজঘাট, ফেৰীঘাট গঢ়ি উঠে।
৭। চমুটোকা লিখা—
কয়লা, খাৰুৱা তেল।
উত্তৰ:
কয়লা: কয়লা হৈছে প্ৰকৃতিত পোৱা গুৰুত্বপূৰ্ণ ইন্ধনসমূহৰ অন্যতম৷ বহু নিযুত বছৰৰ আগতে পৃথিৱীৰ উপৰিভাগত থকা গছ-গছনিসমূহ প্ৰাকৃতিক দুৰ্যোগৰ ফলত ভূ-গৰ্ভৰ বহু তললৈ পোত গৈছিল৷ এই পোত যোৱা গছ-গছনিবোৰৰ ওপৰত তৰপে তৰপে বোকা জমা হৈ কিছুমান স্তৰৰ সৃষ্টি হৈছিল৷ ভূ-পৃষ্ঠৰ তলিত পোত যোৱা এই গছ-গছনিবোৰ লাহে লাহে ভূ-পৃষ্ঠৰ প্ৰচণ্ড চাপ আৰু ভূ-গৰ্ভৰ তাপৰ প্ৰভাৱত কয়লালৈ ৰূপান্তৰিত হৈছিল৷
অসমত প্ৰচুৰ পৰিমাণে কয়লা পোৱা যায়৷ বিশেষকৈ মাকুম, লিডু, মাৰ্ঘেৰিটা, জয়পুৰ আদিত কয়লা পোৱা যায়৷ কাৰ্বি পাহাৰৰ কয়লাজান, শিলভেটা আদিত কম পৰিমাণে উৎকৃষ্ট মানৰ কয়লা পোৱা যায়৷ কয়লাৰ খনিত কাম কৰি বহুতো মানুহে জীৱিকা নিৰ্বাহ কৰে৷
খাৰুৱা তেল: বহু নিযুত বছৰৰ আগতে সাগৰ-মাহসাগৰ আদিত থকা শেলুৱৈ জাতীয় উদ্ভিদ আৰু সৰু সৰু প্ৰাণীবোৰৰ মৃত্যু হোৱাৰ পাছত সাগৰ-মাহাসগৰৰ বহু তললৈ গৈ বোকাৰ মাজত পোত গৈছিল৷ এই মৃত উদ্ভিদ আৰু প্ৰাণীবোৰেই ভূ-পৃষ্ঠৰ প্ৰচণ্ড চাপ, ভূ-গৰ্ভৰ তাপ আৰু বেক্টেৰিয়াৰ ক্ৰিয়াৰ ফলত খাৰুৱা তেললৈ ৰূপান্তৰিত হোৱাৰ লগতে প্ৰাকৃতিক গেছৰো সৃষ্টি হৈছিল৷ খাৰুৱা তেলসমূহ জুলীয়া অৱস্থাত থাকে৷ শিলৰ স্তৰসমূহৰ মাজত আৰু সাগৰৰ তলিৰ নিচিনা ভূ-গৰ্ভত খাৰুৱা তেল পোৱা যায়৷ অসমৰ খাৰুৱা তেল থকা ঠাইকেইখন হ’ল— নাহৰকটীয়া, হুগ্ৰীজান, মৰাণ, ৰুদ্ৰসাগৰ, গেলেকী আৰু লাকুৱা৷ খাৰুৱা তেল পৰিশোধন কৰি পেট্ৰ'ল, ডিজেল, কেৰাচিন, নেফ্থেলিন, মম্ আদি পৃথকে পৃথকে প্ৰস্তুত কৰা হয়৷
